Reipasaona liata namâ ngia lei nawpa ta thyu u la, thlahchhâ teh u.

Khizaw liata chariah chichhih chaipa cha: Reipasaona he a châ. Cha reipasaona cha chyhsazy Khazohpa lâpi tawhta pavisa awpa reipasaona he a châ. Cha reipasaona hnôhky liata a taotuhpa nata cha reipasaona a hriapazihtuhpa cha Zisu Krista a dyutuhpa ahripa Sâtâ a châ. Cha ahripa Sâtâ cha ta ano pôhpa heta a vaw luah tiarâh leipa ta, chyhsa nahzy Khazohpa lâpi tawhta ama pavia sai thei nawpa heta a vaw hmâpa chhaichhizy cha: Khazohpa hlâta khoh a chhih viapa a lyu kawpazy, Khazohpa hlâta chichhih viapa a lyu kawpazy, ahao a chhih kawpzy, khoh a chhih kawpazy, ngâchhih kawpa a lyu kawpazy, he hmo he Khazohpa tao thei khao ngyu aw vei tahpa a lyu kawpazy, hawhpa a lyu kawpazy heta vaw hmâh tyh ta. Cha a vaw hmâpa hra cha ano pôhpa ta â vypa a châ khiah cha a lyu kawpa chhaota a vytuhpa kha eima hmô tita, he he cha Khzohpa tawh châ khao vei tahpa he thlai ta eima pahno awpa a pha kaw taraw cha, eimâ viasa chaipazy kha vaw hmâh, eima sanawh chaipa kha vaw hmâh, eima hrialâh chaipazy kha vaw hmâh, a châh châh ta cha keima tlai he eima kiapâh liapa châta miah a hmâh a tah tyhpa vâta pathlua pachhaih nawpa he tha ta a ru hmeihseih. Sibeizy (Dawhtyzy) ta hriiah ama hmô thei nawpa ta, hriiah di kawpa, mo ta h

mô thei leipazy ama hmô thei nawpa ta, microscope ama hmâpa hawh heta eima sapa mokhaoh heta cha he he nâ paviasatuhpa ma keima châta a vaw tuah haw heih tahpa he a hmia seih nawpa a ru hmeihseih. Cha a hmiaseih nawpa a ru kawpa lia cha, a châh châh ta cha, eima nôpaw nawh ta eima chyhta no phôhpa miah chho tyh ei ta, "Tlâuah cha ano a iethlu ralaw ta, a no chao liata a iekhie kha mohropa chao liata hnia ta, 'Nâma he a iethlutuhpa na châ', tah, ano ta kha ama ie roh kha thei tua chai chhyh haw," tahpa ta ama reipa hawhta a châh châh cha ano miah a vaw reipasaopa kha miah a vaw reipasaopa a châ tahpa vaw pahno thai khao tyh leipa ta, "Kei la, cha hawhpa cha khoh rai vana", tahpa eima pathi chhie kaw tyh, reipasaotuhpa khoh leipa kha keimo khoh leipa hawhta a vaw châ ta, cha reipasaotuhpa khoh leipa cha a tu khei ha awpa taih miah a atao. Keima cha a châh châh ta ei tah tyhpa cha, "Hy, Sâta y, nâma cha ti thai awpazy, sâh dai awpazy hnei leipa ta, ngiapâtuhzy parao pakei, pabuapabâ awpa tlai he na rai a châpa naihta, miah na tao tyh tlai aw," ei vaw tah tyhpa he vaw châ ta, chavâta cha reipasaotuhpa cha Ngiapâtuhpazy, Zisu Krista angiapâtuhpazy, Zisu Krista amâ ngiapâna tawhta ama paosai thei nawpa nata angiapâ mâh leipazy ta, "Angiapâ leipa he a pha tu haw tlai," tahpa ngiaparyhsa awpa tlai he nohchareih ta a reipasaona lai chaipa he a vaw châ.

Cha reipasaona chata chyhsa liata a thei vaw pathei laihna dâh cha: Keimo liata Khazoh bie y khei leipa ta, Khazoh Hla Vitamin vaw chyh laih bâ,  Khazoh Bie Vitamin vaw chyh laih bâ, eima Thlahchhâna Vitamin vaw chyh laih bâ a vaw tah tita cha, sasyh chô lia palôhtlâh leina, eima nôpaw chô lia palôhtlâh leina, viasa chô lia palôhtlâh leina, hrialâh chô lia palôhtlâh leina, Khazoh chô lia palôhtlâh leina, a chhâna ta khichâh pha leina chô liata palôtlâh leipa a paphôh haw tyh bâ. A hmôpa to he a paphôh nawpa sai lâta â lie haw bâ. Chavâ heta kha palôhtlâh leinazy kha ta sasyh a thiesaona taih he vaw pih ta, mohropazy thiesaonazy taih heta vaw papi ta, mohropa râh paraona taih heta a vaw papuapa a châ. 

Cha liata a raihria a chhâ mâh ma tah khiah cha chhâ mâh vei. Ano raihria a chhâna su cha: Khazohpa hnohta chhâzaw ta charei awpa tovyuh kha eima pôhpa, thlahpa, thlahmihpa tahpa pahlyhpa ta Khazohpa khinarâh liata chhâzaw ta y theina tovyuh kha chhupa ta, chhâzaw ta mei tipo liata Sâtâ hnohta lôtlao khao awpa duahmo taih kha miah â chhi khoh chainapa reipasaotuhpa a chhâ pachiena ta â râpasua chaipa a target â nua chaipa he a vaw châ. 

Chatlu cha ta reipasaotuhpa cha chi a chhih kaw hrasala, a thohnapa cha Thlahchhâna he a châ. Bei Zisu cha chakao awpa ta â thao na kha noh sypalih nah zâ sypalih chhôh nie leipa ta y ta, a vypa reipasaona zydua kha a pahnie khai haw. Kesemani sadô liata ama khaipâ bâ aw no kha Thlah a Chhâ heih pyly. Ama patusa chyta liata Tlah a Chhâ heih pyly. Chavâta, Abei Zisu eima zipa, eimâ ngiapâpa, Zisu Krista he thlahchhâna ta tho Kraws lia he a pahnie.

Chavâta Khizaw liata reipasaonapa lai cchaipa, chariah chi a chhih chaipa, pôhpa chhao thlahpa chhao, thlahmihpa chhao Kehenâ mei tipo liata maniah a thy theipa molei reipasaona tiah theina cha Thlahchhâna he châ ta, chavâta eima râh liata Khizaw Thlahchhâna Opi dawh 24 chhôh thlahchhâna opi he sa sih la tahpa he cha, reipasaona pahnie theinapa university he sa sih la cha lia eima chi pathla zydua heta Khazohpa nahta akao pazao pha lymâpa ta chhâ a vaw y awpa liata reipasaona a phopho ta a vaw y awpazy he Paw, Saw, Thlahpathaihpa chhihthana ry ta lia heta reipasaona he vaw pahnie chhyh haw ei ta, cha khiah la, Abei Zisu, "ta reipasaona liata namâ ngia lei nawpa ta riah vaih u la, thlahchhâ muh vy," maniah tahpa kha riahvaina o eima sa aw, thlahpa lâ laiseihna o eima sa aw. Khizaw liata thlahpa leidiapa hluhpi pachha awpa ta opi eima sa aw. Chavâta tanoh ta o eima sa awpa he, hia kha lâta he Khizaw Thlahchhâna Opi sa awpa he Assembly ta a pathlu ma, he he khâpa Synod ma a pathlu tahpazy he a peimawh kaw taraw aw. Châhrasala, cha lia hlâta ahy ma a sa tahpa hlâta, he liata thlahchhâtuhpa eima hluh awpa nata he liata thlahchhâna chôta reipasao chariah a vypa eima pahnie lymâ awpa he a peimawh chaipa châ ta, eima râh lia Khizaw Thlahchhâna Opi eima sa awpa he eima sa pathaona châ aw ta, su to liata eima yna maihkaw he, eima ochhôh lia he hmahta thlahchhâna opi he eima sa aw. Chakhiah cha khizaw liata chichhih chaipa molei reipasaona chariah chichhihpa he eima pahnie thei aw.

Eimâ ngiapâna chariah miah dyuhpa eima pahnie thei lymâ nawpa ta Khizaw Thlahchhâna Opi sa suh vy. 

Abeipa ta a theituhpa zydua hnohta Thlahchhâna Opi awpa ta a thiehpa ta eima palôh tha miah patlô mawh sy.