Kyhpachâ Krista Awnanopa Marasawzy lâta châ paphaopa ei 8na

NOHTO HRONA CHÂTA ACHU LYMÂ HMÂH  LYMÂ SUH VY!

“Ei raopakypa a ky ula, ei hnoh ta a chu teh u, cha pahâsa vâ ei na; areisi nata pathipalôh nônaipa ei châ, nama thlahmihpazy châta pahâna nama hmô aw.  Ei raopakypa pha ta, ei phao chhao a hua tlôh ta” (Mathai 11:29-30)

Khizaw liata chyhsazy ama tlua chaipa he alyna, phaohuana nata pahâna zy he a châ. He zy he nohto ta tlua hialia awpa tlai a châ. Keimo, Zisu Krista angiapâtuhpazy châta thâtihpha chaipa cha, cha zydua cha Zisu Krista hnohta nohto achu theipa a châ. Eima pôhpa nohto hrona châta Thlih pathaihpa, Ti pathaihpa nata Niedo pathaihpazy abyuh ta eima tlua lylia, eima niedo lylia pa hawhta eima thlahmihpa nata thlahpa châta sonazy, novâhnazy, thainazy tlua lyliapa ta hmâ lylia awpa â byuh.

1) Hrona nata sona he Khazohpa Biehrai liata tlua lymâ awpa: Hrona nata sona hnawh he Khazohpa Bie liata deita a ypa vâta hrona ( chhâzaw hrona) nata sona (chôlâ tawhta azupa) ahnei khohpa maih ta cha, noh 1 ta Dawh 24 chhôh liata Khazohpa Biehrai reina daihti, hmâ awpa zy châta achuna daihti, hmâna dâh hmâpachhina daihtizy, noh kha chhôh raihria peimawhpa raihpataihna hai awpa a châ. Mydi eima kaw thyu na ta, nônai chaipa nata phaohua chaipa Zisu Krista liata achu ha tua suh vy.

2) Thaina nata Zôthaina he, athai chiehpazy châbu ropa liata tlua lymâ awpa: Thaina nata zôthaina hnei thei nawpa ta cha, athai chiehpazy tawhta a chuna, athai chiehpazy ropa châbu reipa ta a chu awpa a châ. Athai chiehpa bie nata châbu tawhta pathaopa ta âmo thai chiehpa liata, chhânahta ahmie âhkhaoleipazy ama pathaona daihti liata cha, atahmâ chhâ liata rairuna a y chiehpazy, a y mâleipa vâta bâhta baichha awpazy he keimo achu pathituhpazy taovyuh a châ. Athai chiehpazy ro chiehpa nata pachuna tawhta eima pathao vei khiah ta cha, mawtaw lâpi pha kawpa sachiehpa a y thlâh hapa ta, râhpathohpa liata a sie khohpa, lâpi a chatôh ngâlâpa hawhta eima châ aw. Mohropa thai chiehpa liata pathaopa ta bâhta eima pakawh theipazy a y tlakaih khiahta cha, keimo chhao chhâthieh sawzy châta rei chiehpa ta, a ao ta tlymâ, roh chiehpa ta, a châbu ta tlymâ pasopa hra awpa taovyuh chhao eima hnei.

3) Achu chiehpa nata thai chiehpa zy hmâpazina ta nohto hrona duahmo pathlai awpa: Achu chiehpa nata thai chiehpa zy hmâpazina liata dei, hro pathlai byuhpazy pathlai theipa a châ. Khazohpa ta chyhsa to he “-Bienyupa- Password” a eihpa  sai ta miah apie khai hapa vâta, chyhsa hropa ta chyhsa hropa hrona pathlai thei rima awpa châ vei. Sasyh biechhawhna dei ta hâla khohpa chyhsa hâla theipa châ ta, Khazohpa deita chyhsa a pathlai thei. Chavâta keimo hrona nata duahmo miah a pathlai thei awpa cha, miah a taotuhpa Khazohpa nata keimo sasyh âpathlaih awpa ta biechhawhna nata hriapazina liata a y. Nohto ta achu lymâ, eimâ chupa hmâ lymâna chôta Krista lyu awpa ta âpathlai lymâ suh vy!

Rev. Mai Ki (Executive Director, TSD)