Rev. Mai Ki: Khazohpa cha â mâ thlâh haw, nâma zaw?

Na hiah la, chatanachata phopi cha na ryutona châta ei cha pie aw, kaoki chhâna na ryu châta ei cha pie aw. (Hlazy 2:8)

"Khazohpa ta khizaw kaoki zydua he eima ryu awpa lâta miah awpa amâ thlâh ha ta, keimo zaw ala awpa eimâ mâ ma?" tahpa he ei cha pahrua khoh kaw ei.

"Phopi zydua he na ryu lâta ei cha pie aw," miah tah ta, a kawhna lâ he khizaw kaoki chhâna a châ tah ta, cha cha a châ thei aw ma tahpa eima pachâ khiah, a châ thei tlai. A sawchapaw pakhadeipa hmahta pahlôh leipa ta miah pietuhpa cha miah a a pie tlai aw. Khazohpa cha, "Na kaw hiah u la, cha pie awpa ei mâ thlâh ha" a tah. Nâma nah keima he zaw hia awpa eimâ mâ ma? "Eima ryu châta Khazohpa ta miah pie awpa ta bie miah a taih chiehpa he hiah bâ suh vy" tahpa he cha pahrua khoh kaw ei nah ta, Kheihta e eima hia aw? Khâpa lâ tawh eima hia aw? tahpa he a chyhta ei vaw rei khoh kaw. 

Eima hia awpa hecha Khazohpa ta Khizaw chyhsa zydua châta a sawchapaw miah vaw pie chhâna hecha hrona â kipa ta eima hnei nawpa ta a sawchapawpa he a piepa a châ. Eima hia ti heta, "Kheihta e na hiah muh vy, ei saw saih u" miah a tah tahkhiah cha, Aw, Abeipa, pachhana kipa, tlokhuh pachhana kha khizaw saw zydua ama to khai awpa he khoh pih ta, cha tlai cha keimo he eima cha hiapa a châ. Hla phituhpa ta, "Khizaw hmahsiena a sâh via lymâ ta, ngiapâtuhpazy nawh rili aw ei," a tahpa hawhta khizaw a hmahsie via, Khazohpa a byuh leipa hawhta y via, tahpa khizaw lia he sie hai pih ta, tahmâ he Marasawzy Zisu thâtih eima thei tawh kô 119na a kaw phana lâsâ tawh he eima nôpawzy daihti no hawhta eimâ ngiapâna he eima zôpha tiarâh khao vei. Eima taotia dâh he, vaw peimawhpa châsala, notlahzy achhypa lâ hmahta a papeimawhsa khao lei awpa he chyhsapa eima châpa hrapa vâta chyhsazy ama thaina kao zydua he eima rao thai hra. Chavâ heta keima he cha Theihthaipa chipho hawhta liahsa a pasôhpa ta vârâh hawkâ eimâ ngia hlâlei heta Theihthai beipazy thlah ama chhâpa hawhna heta, Lyuhchâ Pity ta, "Keimo cha Theihthai chi eima châ," a tahpa hawhta 100 liata 100 kri eima zypa he Khatino raita kheihawhpa chhâpha vaw chhi hrasala, kheihawhpa chhâ chhie vaw chhi hrasala eimâ i thei nawpa heta eima râh lia he thlahchhâna opi he sa sih la, Marasaw he khizaw lia thâtihpha chho awpa ta maluh chyh tiarâh mapi ei tah khoh chhyhna chhâpa cha Pachutuh 12 maluhzy hlâta eima hluh via. Chavâta Khizaw Thlahchhâna Opi eima sa awpa hecha kheihta ma eima sana dâh a châ aw tah khiah cha: A liahlia he Paw, Saw, Thlahpathaihpa Opi eima sa aw. A kâ chavei chachâh, a hmiahnôh zydua he Pachutuh pa (12) Opizy he eima sa aw. Cha pamosana cha "Thyu la, khaih teh. Khizaw kaoki liata thâtihpha chho awpa heta eima râh (Mararâh) lia he Pachutuh O sâ (12) he Paw, Saw, Thlahpathaih Opi chadôpa heta eima sa aw. 

He liata aly kawpa ta ei cha vaw chho khoh kawpa ei cha: He Pachutuh O (12) zydua he a vaw satuh penawh he ABEIPA ngiachhiena vâta ama vaw book khai haw! Cha liata hrâhrâ ta eima vaw pahlôh haipazy cha: Malaysia Marasaw heta sâ kha cha ama sa awpa heta vaw pahlôh pih ta, âmo hnohta chho mâh mapi. Singapore Marsaw heta sâ kha cha ama sa awpa heta vaw pahlôhpa chy pih ta, cha vei khiah cha he O (12) he â vaw ki khai haw bâ. Tahmâ ta zawpi eima hrua khohpa hecha: Paw, Saw, Thlahpathaihpa Opi sa nawpa nata a chheipâh liata ârie ta thlahchhâpazy amâ vyh tyh tita, amâ vaw rie nota ama tlôkia nawpa o, beih amâ chho nawpa o hawhpa ozy he zawpi châta â vaw tâh bâ.

Nohro cha Lodon Khihpi tawhta Mararâh lâ Misawnâri a vy ta, tahmâ cha Mararâh tawhta Khizaw kaoki lâ eima sie aw tana he a vaw châ. Chavâta nâma nah keima eima chhâ liata Khizaw Thlahchhâna Opi sa eimâ ôpa hecha; Ei cha pahrua khoh ngâsâ kawpa ei cha; Eima py chhôh liata eima saw he hmahta lieraotlo (အုတ်ခဲ) tlo kha chhâ a sa awpa he keima cha ei ngiabâh kaw. Tahmâ Hawti Pyzy he, "Ei Kheihkheih, lieraotlo tlo kha he Ks. 1,200/- a châ. Râhvâ phia (1) he a chha kawpa châ ta, âthao tua no cha Aluminium he dia'pa a chhuah tua raw pih ta, Aluminium hecha phia (1) ta, Ks. 50,000/- a châ rawlaw. Tahmâta Zisu thisaih rôh hawhpa hecha phia (1) ta Ks. 1,000,00/- a châ. Chavâta he a liahlia Paw, Saw, Thlahpathaihpa Opi sa awpa he Australia Awnanozy chhochhi cha Paw, Saw, Thlahpathaihpa Opi Thlalâaw zydua châta a vaw buh ei ta, ama vaw pie khai haw! Paw, Saw, Thlahpathaihpa Opi Chhikaopi zydua kha Mch. Vâkhe chhôhkha ta booking ama vaw tao khai haw! Atahmâhlâ khizaw eima mo khiah, Abei Zisu ta, "Ei vy chy la, chata cha a tah aw," a tahpa zydua he tlô lymâ bâ ta, Abei Zisu miah a vaw dy hlâta heta, he he patlô khaipa ta, Khizaw châta dawh (24) chhôh thlah eima chhâ ualua ta, Abei Zisu miah a vaw tlôphâh awpa he keima cha khoh kaw nah ta, chavâ heta ei cha pahrua khoh kawpa eipa a vaw châ.

Khazohpa cha â mâ haw. Khizaw kaoki zydua, chi to pho to zydua eima ryuto châta pie awpa â âmâ haw. Nâ nah kei zaw thlahchhâ awpa ta eimâ mâ mâh ma? tahpa hi. Chavâta keima cha na zâh chhôh liata tâkâ (phusâ) a ypazy, na tâkâ byh liata a ypa tâkâzy he vaw thyu la, sa para sih la, sa chatlei sih la, tâhmâ he Abeipa ngiachhiena vâta Khizaw Thlahchhâ Pheisaih mebâh he 1150 he eima vaw pha hai chy. Keima cha kheihta rai châsala, Marasaw a chyh chai ta, Khizaw Thlahchhâ Pheisaih mebâh he 30,00 hnei thei haw sih la, chi hro pho hro zy he Abeipa ta khazie e miah a pie, Khizaw Thlahchhâ Pheisaih mebâh ta a vaw ngia ei sala, nohchareih he khizaw châta thlah a chhâ pareipa mebâh 3,000 ta eima chhâ parei khiah cha Vâmo ta cha sâhthôhnawh cha padiah thaipa châ hlâ ei ma, ama kaw hiapa khu moh pih ta laima, keimo khohpa nah â tla kaw, Avâ liata Khzoh khohpa ama tahpa hawhta Alei lia tah mawh sy tahpa tlaita lai ma thlah ama chhâ hai. Keimo khohpa nahta alyupa thlahchhâna 3,000 a kaw tlô. tahpa he a paraoh awpa heta Khazoh paypathâsa hra lei, keimo ypathâ hra lei tah awpa heta thlahchhâpa he raihriapa a châ. Viapa, daihpa chi châ vei. Odyh dyh (1) hmahta concrete o (တိုက်အိမ်) ama  sa thei khiah cha, kheihta e Marasaw zydua eimâ pahlypa cha Khizaw Thlahchhâna Opi, tahmâ he Pachutuh penawh O hecha 7' x 7' châ ta, o (1) he Ks. 8,000,000/- deita he a chhâ. Cha hawhta a liahlia Paw, Saw, Thlahpathaihpa Opi cha 30' x 30' deita he a châ. Chavâ heta cha cha Marasaw nahta eima sa thei lei nawpa hecha y thei leipa ta, eima sa khoh nah khoh lei deita he châ ta, sa khoh suh vy. Khazohpa cha phopi zydua eima ryuto châta pie awpa he amâ haw ta, khizaw kaoki chhâna taih eima ryuto châta pie awpa he amâ haw ta, nâ nah kei he amâ sih la, kyhpachâna ku ta a chaao sih la, bâ leipa ta thlahchhâ sih la.

Elaiza cha keimo hawh nôchâ phaohpa châta a palôh chhâ thaipa a châ hra. Anodi thai hra, a thachhâ thai hra. Châhrasala, ano thlah a chhâpa kha khichâh hmah a panano thei. Tanoh nâzy nah keizy hmaohkha ta thlah eima chhâ awpa he hmo dita châ vei. Hmo lai kawpa eima sa awpa a châpa vâ heta, nâ chhao, na chhôhkha chhao, na samohnô chhao, na samohpaw chhao, na maohnô chhao, na piah chhao pahrua ha bei la, Khizaw Thlahchhâna Opi he vaw sa hmâ ngiathia bei mah y tahpa he ei cha vaw pahrua khoh kaw ei. Abei moh chhâzaw reithai' ta y mawh sy!

Eima châpaw na vaw reipa vâta eima châ ly kaw. Platform hro liata miah vaw charei bei mah y:

Facebook: https://www.facebook.com/share/v/1G45wdjF7S/
YouTube: https://youtu.be/GVx75GVmaok?si=gRmj-KcmQzbihnhp