TSD News: Mr. Romawia Testimony

Nama zydua samaw ei cha hlâ ei!

Mr. Romawia

Keima moh cha Romawia (Aro) châ ta, Patheitla khihpa ei châ. ASE sikuhawti châ na ta, Tahmâ he ICFAI University, Shillong, India liata Bachelor of Business Administration (BBA) ei chu hai. Keima cha COVID - 19 nata eima râh buana vâta Siaha, India lâ khy na ta py-11 &12 ei chu pazao. ABEIPA baona vâta py-12 hlaotloh thei na ta, sôh kyh rairuna vâta achu pazao nawpa kyh liata, palôh rietheina thata ei vaw hnei. Cha nota TSD ta achu khohpazy a deichhyna thâtih ei vaw thei. Cha TSD deichhyna(scholarship) tovyuh cha vaw hia hra na ta, ASE sikuhawti pakha ta nâ vaw pyh thei ei ta ei ly ngaita kaw. Ryhraotuh ABEIPA nata TSD chô liata alyna bie ei reih hmeiseih.

TSD ta keimo achu haipazy châta a taopa: Kâhvilei thlahchhâna nata ABEIPA achhyna parôkarâzy ta ei thlahpa hro tha na patlô ta, Khazohpa nahta akaona, âhnia viapa ta eina vaw pahneisa kaw. TSD chakaona he achuna, sapa nata thlahpa kyh liata, chhôhkha deichhy chhihthana phapa sâkha hawhta ei vaw hmôpasia. ASE sikuhawti ei vaw châ vei khiah, keima châta hmialâ hnabeiseihna a-ipa y thlyu aw vei. Chavâta he hawhpa rypaohna tovyuh ei to theipa he thata aly na ta, ei pasô hmeiseih hra.

Achu haipazy lâta ei bieta khohpa cha: Kheihawhpa rairuna rai y hra sala, achuna he hnôh asy sai khah ei suh u. Rypaohna pasô ei sih la, hmâ thai achhuah suh vy. Achu awpa khoh ta sôh kyh rairuna a hneipazy cha, TSD deichhyna he hia pachhi hra u la, â rypaoh khiahta la, nama phahnai kheih kaw aw. Eimâ chuna he keimo nata eima tinatlâh chipho châta a phahnai thei awpa taihta, thlahchhâna chôta liahsa tiama papua chyu suh vy! Ei châ ly kaw ei.

Related stories

No comments