Kyhpachâ Krista Awnanopa Marasawzy lâta châ paphaopa ei 7na

 KHAZOHPA BIE REIHLUH VIA LYMÂ SUH VY!

 “Cha hawhna hra chata ei bie chhao, Ei pakah tawhta pua aw ta; Aruapa ta kei lâ vaw kua aw vei. Ei chhuahpa patlô aw ta, Ei tuana chhâpa rai a pangoh aw. Thaphapa ta pua aw ei chi ta, Thlalôhpa ta a chhipa nama châ aw; Tlâhpizy nata tlâhthlôhzy ta Nama hmiakô liata hla sa aw ei ta; Lyurâh thokô zydua ta Ama ku ama chabaih aw.”  Isai 55:11-12

Khizaw liata Bie hmotaothei chaipa he Khazohpa bie a châ. Apuana maih ta Khazoh khopa atao theipa a châ. Khazoh khopa tao awpa he Zisu Krista khizaw lâ âvy chhâna châ ta, keimo chyhsapa eima vaw pih chhâna chhao a châ. Chavâta eima hrona daihti sôh kawpa liata, rei hluh chai awpa bie cha Khazohpa bie a châ. 

1. Mydi eimâ kaw hra na ta, zâ eimâ mô bâ awpa nota Khazohpa bie eimâ vaopa rei awpa 

Mydi eimâ kaw hra tuachaina daihti cha eima vaw pihna daihti hawhta a châ. Eima vaw pih tuana daihti liata Khazohpa Bie rei tua ha awpa he apha ngâsâ. Khizaw liata Bie hmotaothei chaipa, eimâ kaw hra hmiatuana daihti liata rei tua awpa a châ. Khazohpa bie eimâ vaopa a y tlâ vei tlamaw khiahta cha, Khazohpa Thlahpa Pathaihpa nahta bie reilâh tua chai awpa a châ. Eimâ mô bâ awpa daihti he eima thi bâ awpa daihti hawhta a châ. Eima thi hlâta Khazohpa bie eimâ vaopa rei ha sih la, Khazohpa bie chhao ta Zisu Krista hmia hmô awpa ta eimâ chhuahnohna a châ.

2. Chyhsapa nata bie eima reih lâhna maih ta Khazohpa bie pahlao lymâ awpa 

Chyhsapa bie eima reilâhna ta Khazohpa bie khazie e eima chhôh liata eima pabie tahpa âlâ theipa a châ. Chyhsapa bie heta chyhsapa parao tyh ta, Khazohpa bie deikua chyhsapa a taopathi tyh. Khazohpa bie he chyhsapa siena châta khaihna nata mei-ôh a châ.  Khazohpa bie he a reituhpa châta chhao, a theituhpa châta chhao hmotaotheina a hnei. Zaozi akoh nata ahâh atiah raihriepa hawhta a châ. 

3. Nôvah likawh biereina liata Khazohpa Bie thata hmâ hluh awpa 

Nô nata vah miah a pie raihriepa he Khazohpa a châ. Nô nata vah likawh liata Khazohpa ngiachhiena, phana, kyhpachâna, zawngiahna kyh, raihria tiamana kyh thata reih tyhpa ta, Khazohpa hâla awpa a pha kaw. Nôvah likawh liata Khazohpa bie a chakâh khiahta la, amaochhienazy, ahryuna zy, aeinazy nata achhaihna zy taih ta a y thei aw. Nô nata vah he ta Khazohpa bie thata eima nohto hrona liata eima pahlao khiahta la, eima sawzy ta Khazohpa bie nata rei ama thai hra aw. 

4. Sawzy liata Khazohpa thata hmâ hluh awpa

Khazohpa bie hmâna su peimawh chaipa sâkha cha, sawnawhzy liata hmâ awpa he a châ. Chyhsa a paphasa theipa cha Khazohpa bie deita a châ. Khazohpa bie chholeipa saw he la, ano phata ta pha thai vei. Sawzy Khazohpa bie hmotaotheina pahnosa awpa he nôpawzy raihria peimawh chaipa a châ. Nôpaw eima hrothlâhpa ta eima sawzy Khazohpa Bie eima chho vei khiahta la, eima hro thlâhpa ta eima sawzy eima pahârasa thlâh ha aw. Eima hro chhôh ta eima sawzy liata Khazohpa bie rei hluh via lymâ suh vy!

Rev. Mai Ki (Executive Director, TSD)