Khizaw châta Thlahchhâ suh vy!

 "Na khohpa lâ vâ liata ama tahpa hawhta alei liata tah mawh sy"

He he Abei Zisu Krista pachuna, thlahchhâ pachuna eima vaw pazaopa tawhta takô he kô 119, Misawnâri a vaw tlôna kô a vaw pha haw bâ vâ heta tanoh lia he Zisu Krista thlahchhâna pachupa a pazao tyhpa zydua lâ liata a eih via ta, ei châ haw khoh kaw ei. "Khizaw châta thlahchhâ suh vy" tahpa he ei cha pahrua khoh kaw ei.

Abei Zisu ta thlâhchhâ miah a pachu lia heta "Avâ liata Khazohpa khohpa ama tahpa hawhta, alei liata tah mawh sy" tahpa he thlahchhâ miah a pachu vâ heta Khazohpa ta a sawchapaw Zisu Krista khizaw lâ a vaw tua chhâpa cha: Khizaw chyhsa zydua he pakha hmah pahlôh leipa ta, chhâzaw hrona ama hnei khai thei nawpa he ta a vaw tua chhâna he a châ.

Abeipa Zisu Krista miah a vaw dyna daihti â hnia via lymâ. Â hnia via lymâ. Cha nota pakhata chhao siesai leipa ta Zisu Krista â vy heihna daihti liata pakipasy ha awpa nata khâsia ha awpa he tanog 100% Krizyhpa a châpa Marasaw zy lia heta maohphaona tao vyuh lai kawpa heta a vaw pachâ.

Chavâta tanoh su to, râh to liata Khazohpa ngiachhiena vâta Abeipa ta hrâhrâ ta eima mahnômahpawzy thlahchhâ tyh leina, râh pha ngâsâpa su lâta a cha chhihthapazy, su nanonaopa nata eima mahnômahpawzy a tyu tyh leinapa ofis pha ngâsâpa lia a tyuhpazy, mahnômahpawzy ta ama mâ ama sa ngai leipa o pha kawpa liata a tyuhpa Marasaw zydua ta ei cha pahrua khoh kawpa ei cha: "Khizaw Thlahchhâna Opi sa suh vy" tahpa he a châ. Khazia maw Khizaw Thlahchhâna Opi he eima sa aw tah khiah cha: Khizaw châta thlah a chhâtuhpa, ngiapâtuhpazy eima râh tawhta amâ zaokhi parei awpa he a vaw peimawh kaw.

Awhpinô cha ano saita nota cha a tih thla ta, adyu he taopa pih ta, a vaw kie tita cha, ano tie a vaw châ thei awpa awhtawtaw hluhpi a vaw patapa he eima vaw hmô.

Chavâta tahmâ ta, eima râh lia pastor ngâchhih kawpa, khatlu rai chariah-chakieh vaw tlô hai hrasala, Awnanopa arâsai leipa ta, thlah a chhâ pareipa pastorzy, hyutuhpazy, KNP luhzy, Evangelistzy, Awnanomachâzy, ... he luhpa zydua nata luhpa châ raw leipa ta ngiapâ a-i kawpa nôpawzy, thlahchhâna hmotaotheina a padi hawpa eima nôpaw nah he leilô yzie hawhta noh noh kha cha avâ râh lâ miah siesai ha aw ei ta, chhâ thieh saw nahzy pi heta khizaw châta thlah eima chhâ pazao parei nawpa heta eima râh lia he Khizaw Thlahchhâna Opi he sa chatlie sih la, sa para ha sih la, hmaohkha ta ta, Paw, Saw, Thlahpathaihpa amâ pakaohpa hawhta nâ chhao kei chhao liahsa a pakaohpa heta Khizaw Thlahchhâna Opi he eima râh lia he sa sih la, cha eima râh liata eima taopa Khizaw Thlahchhâna Opi lia cha Khizaw châta dawh (24) chhôh apahâ leipa ta thlah ama chhâna châ sala.

"Kuvâ daoh a yna khih lia cha Kuvâ chaeih thaipa ama hluh khiah cha, Khizaw Thlahchhâna Opi a yna su lia chhao Khizaw châta thlahchhâtuh, mo pathaih penawhzy ama hluh aw."

Keima cha ei vaw pachâ tyh kuvâ daoh a yna khih lia he kuvâ a chaeih thai viapa ama hluh via. Cha hawh khiahta cha Khizaw Thlahchhâna Opi he a vaw y hawpa a châ khiah cha, Kha liata ngiapâ phapa nô machâzy, paw machâzy, Evangelistzy, Pastor paisaih a hria haipazy ta thlah khâ ama vaw chhâ lymâ khiahta cha: Eima saw nawhzy heta khizaw châta thlah ama chhâ tyhpa he vaw hmô aw ei ta, tahmâ ta a hroh chypa eima nôpawzy he avâ râh lâ sie haw hra ei sala, Abei Zisu miah a vaw dy khai hlâlei Mararâh hecha Khizaw châta thlah ama chhâ tyhna râh, Khizaw châta thlah a chhâtuhpazy ama yna Opi tahpa heta, alei chô lia he avâmo natha aleimo azao tyhna Opi lâta sa sih la, tahpa he cha pahrua khoh kaw ei nahta.

Kheihta eima tao aw tah khiah cha, hmaohkha ta sa suh vy. Nâma sai sa bei khah y. Keima sai tao hra aw vana. Paw, Saw, Thlahpathaihpa apakaoh hra ei se, keimo Marasawzy heta a pakaoh hra si, chi hro, pho hropa zy he hrua hra si, tahpa ta, he avâ liata Khazohpa khohpa ama tahpa hawhta alei liata ama tah thei nawpa ta eima râh lia he Khizaw châta Thlahchhâna Opi sa suh vy. Marasaw zydua he Khizaw Thlahchhâ Pheisaih mebâh lâ heta angia sih la, Abei Zisu ta avârâh eima tlô tiata khâpa e ei saw saih nama tao tyh? miah a tah tita, "Keimo la, khizaw châta thlah eima chhâ parei tyh," tahpa ta avârâh hawkâ lia he achhy vâ pi tahpa he tanoh liata Khizaw châta Thlahchhâ suh vy" tahpa heta ei cha pahrua khoh kaw ei.