July Thla châta Editorial

 2021 tawhta eima Myanmar râh buabâna vâta chyhsa hluhpi hrona pahlei ei ta, hluhpi pheisy kusypa nata mochao nahpâpa ta ama y. Thokha ozy hnei khao leipa ei ta, thokha ama khihzy puasaipa ta râhpathohpa nata su hropa liatazy rairu kawpa ta ama pahrâ. Kyhtoti pachâpa ta nôpo chichhih thlazohna vâta palôhrupa hmahphaopa ama hluh. Hnatlâna,  achuna, khihsatôtuna, azaokhina nata ativyna kyhzy liata  hnabeiseihna rai hnei thei khaoleina vâta, thokha âmosasyh hrona taih chhao amâ pahlei. Chhôhkha liata hro rietheina nata nôpona ta a bie.

Eima Mararâh lia chhao cha hawh pyly a châ. Chhôhkha khihsatôtunazy, raihria chakaonazy nata sawnahzy achuna chhao a raokei khai haw hra. Hmialâ eima râh he ahy e paduapathi aw ta, a chhihtha bâ aw? Abôchhâtlâh thyutliazy hra cha, eima râh chhôh liata y khao tlôh ei vâ. Adyuhna vâta abohna nata thlalôhna su tluapa ta, Mararâh puasai ei ta,suto liata amâ chopaih hôlô. Ama pahrâna suzy liata chhao thlalôh âchhih leizie thâtih eima dao lymâ. Mararâh liata cha machâpazy nata chiehleipazy deita eima y hluh ha bâ. Khih thokhazy liata cha thina noh liata thlâ a chhiah awpa dâhdei y khao veih ei. Baotuhpazy eimâ ngiah ngaita kaw. O,Lyu nata sadô taonazy liata chhao hnabeiseihna y thai khao leipa ta, Mylâ hânoh eima duahmo awpa he kheihta ma a châ aw vâ tly? Pahnochhielie thaipa châ khao vei.

Tahmâhlâ eima tlôphâh laihpa duahmo to tawhna heta, chyhsapa sona nata patohpatia thaina rakha heta, eima hrona châta phana nata thlalôhna papi thei vei tahpa asia haw. Chavâta baona eimâ ngiah. Cha baona cha ABEIPA tawh deita, he hawhta eima nôpo daihti liah tlai heta, a vaw tlô thei aw (Hla. 46:1; 121:1-2) tahpa khâchâ angiapâ ei suh u. Ato taotheipa ABEIPA cha ahnia parapa ta aw ei suh u (Zer. 33:3). Eima hnohta a y thlâh hapa “IMANUEL” cha tahmâhlâ miah asu ngâhaipa, khizaw tily nata thlihpipazy pahno khai ta, hezy tawhna heta miah vaih, pabohsa aw ta, eima tlô khohpa su cha miah a tlô khei cheingei awpa beiseih ei suh u. ABEIPA baona nata ryhraona eima khih nah râh liata a vaw tlôpazy hmiaseih thei nawpa nata thlalôhpa ta eima y thei nawpa ta:

ABEIPA Bie rei hluh, nahthlie hluh, pachâpazi hlu, hmâ hluh ei suh u.

ABEIPA lâta alyna bie rei hluh, thlahchhâ hluh ei suh u.

ABEIPA palysa thei nawpa ta eima hrona ahlâpa ta, ANO chakao lymâ suh vy!

Rev. Satu Ve U (Chief Editor, TSD)