Kyhpachâ Krista Awnanopa Marasawzy lâta châ paphaopa ei 1na

 Khazohpa Bie cha moto châta hrona a châ. 

Khazohpa Bie cha moto châta khaihna a châ. 

Khazohpa Bie cha moto châta hnabeiseihna a châ. 

Khazohpa Bie cha moto châta hmahsiena a châ. 

Mararâh nata avâ ry, khizaw râh kawhpi liata apahâpa kyhpachâ Krista Awnanopa Marasawzy lâta thla 1 liata ei 1 châ paphao tyh awpa ta ei chhuah. 

Eima hmia lâta châ a thaipazy khata châzy ama vaw roh hnolopa vâta atanoh Biehraizy, Hlabuzy, châbuzy eima rei awpa nata achu awpazy eima hneipa vâta, châbu rohtuhpa zydua lâta a lyna bie ei reih. Châ athaipazy ta châ rohna he chakaona peimawhpa ta pachâ awpa ta Marasaw châ athaipazy lâta ei châ haw ei. Châ a roh thaipa nata aroh thai leipa zydua lâta ei châ haw khohpa ei cha, Khazohpa Biehrai nohto rei awpa he a châ. 

Marapa chipho ta asôhchaipa châna eima hneipa cha 100 % Zisu Krista Awnanopa eima châna he a châ. Krista Awnanopa eima châna pabohsa lymâ nawpa nata Krista khihnarâh eima pakawh lymâ thei nawpa ta, eima nohto hrona châta thlih syna, tidona, pati niena eima tao lyliapa hawhta; thlahchhâna he thlih syna, reithaina he tidona, Khazohpa Biehrai reina he patiniepa hawhta tao lylia suh vy! 

Khizaw liata a so chaipazy cha thi hlâta Zisu a Pachhatuhpa châta angiapâ hawpazy ama châ. 

Khizaw liata a hnei chaipazy cha Thlahpa Pathaihpa a hneipazy a châ. 

Khizaw liata a hlaotloh chaipazy cha thina taih ta Zisu Krista a ngiapâtuhpazy ama châ. 

Khizaw liata a so chaipazy, ahneichaipazy, ahlaotlohchaipazy châ hra awpa ta tiama suh vy!

Rev. Mai Ki (Executive Director, TSD)